Jonah 1
Iahova Sila Provet Siona Vaha Vasel Kat Meatin Keil Ten out Nineva, ▼ ka Siona Enrovatei Vaha
Siona 1:1-17
1En atan ten out Isrel, provet tai mul ien, isen Siona, natin Amitai. En avong tai, Iahova selus mini ka viteni mini vit, 2“Kikalah kiha en mari taon ten out Nineva, ka kisel kat meatin keil koa aro ekonek. Kihiteni min keil keke sakien keil one vilehilu en metok.”3Ka Siona, enrovattei vasan selusien onen Iahova min me-Nineva keil koa amul en kantri tai en usite va ist. Sakini, viles, va wes en sise sav keke valohosai rani. Siona va rokol pasis en taon ten out Sopa, ka en out enek, kei votin sip tai koa amul asak meseni vaha en out Spen, kantri tai koa mul soutin imok en usite va wes. Sakini, vul sise onen ka vut va en sip ral min boskru keil teni. Evus, sip enek muloh vaha en out Spen ral min Siona koa mul lohosai ran Iahova.
4Navong sip enek mul muloh eva, Iahova sakin mari eang tai muhuh keih ka atas emun tisa vis tisa, ka sip koanik vesesal vamahoiahoi. 5Boskru keil ametau houlu, ka retai en keil amis kai va min ahi keil one keke avasan kataunien min keil. Evus, alah lat tounah keil ran valinge sip ka asoni va en atas vasakin sip vamelala.
Avong tounah keil enek mul kur out, Siona mules matil en valinge sip. 6Ka navong vatihos ten sip va neim, kei votin Siona ka viteni mini vit, “!Ei! ?Vensa komul komatil mukok? !Mea ka kihis min ahi onom ven kataunien! Vahesa kei enhemahis ir ka houtut moulien keil orer.”
7Evus, boskru keil alah ruai ka aling revi rendemien keke avaleh eis keke avahotin isei en keil mul lehen an tisa mai kat keil. Ka navong amumoni, aleh isen Siona. 8Sakini avisi avit, “?Ei, hiteni min komai, komumonsa sakin an tisa ekek mul muas ir? ?Umen sa varie komumoni? ?Kantri sa varie koka ien ka meatin onom keil avi meatin sa?”
9Ka Siona vit kesi min keil vit, “Inau navi koan Isrel ka namul nuva netan min Iahova, Ahi ten out nesa koa mumon out netan ka atas emun.” 10Siona vit lati min keil keke mul lohosai ran Iahova.
Navong boskru keil alonge mukok, ametau houlu ka avul kati avit, “?Vensa varei komumon tisaen enek?” 11Ka navong alesi keke mari eang koanek muhuh keih imok, avis Siona avit, “?Kihiteni min komai, mehoumon sa vasakin mari eang koanek vaha netan?”
12Sakini, Siona vit kesi mini keil vit, “Mihou lat inau ka mihesonau niha en atas. En avong koa mihoumoni, atas hemai ris hetahos. Nakilea keke mari eang koanek mul muas kami venau varei.”
13Ka boskru keil erovattei avason Siona vaha en atas. Sakini asak visi avahalis en sip enek vaha ut, ka asakras veni tahe keil umai amariso mok ka eang muhuh keih tamun. 14Sakini apeah Iahova avit, “O Iahova, mevisuk eli keke konasantei mahien min komai ven matien onen meatin koanik. Anatin, konouastei komai li veni keik, Iahova, komumon tounah keil enek mai kistal musil rendemien onom etin.” 15Evus, avou lat Siona ka asoni va en atas. Hatte tas, atas mai tahos eris. 16Navong boskru keil enek ales asa koa kur out, keil vasi avouhou min Iahova marite mok. Sakini, keil asan sanien votut keil one mini keke avamasmasi ka retai en keil amumon hatkatien keil one ral mini.
17Ka Siona romattei. Iahova san mari mesao tai emai remi ka Siona moul mules en vangen mesao enek avong etel.
Copyright information for
PMA